İyulun 16-17-də Səhiyyə Nazirliyi, Azərbaycan Tibb Universiteti (ATU) və “Uptodate in Medicine” qurumunun birgə təşkilatçılığı ilə neyroradiologiyanın aktual problemlərinə həsr olunan e-təlim keçirilib.

Onlayn toplantının açılışında çıxış edən ATU-nun elmi işlər üzrə prorektoru, dosent Rauf Bəylərov bildirib ki, azərbaycanlı və türkiyəli mütəxəssislərin iştirak etdiyi iki günlük təlim radioloq və nevroloqlarla yanaşı, neyrocərrah və onkoloqlar üçün də elmi-praktiki baxımdan faydalı olacaq.

Tədbirin bir sessiyası müasir dövrün aktual problemi olan koronavirusa həsr olunub.

Daha sonra ATU-nun Şüa diaqnostikası və şüa terapiyası kafedrasının müdiri Məlahət Sultanova “COVID-19 pnevmoniyası - radioloji yanaşma”, Mərkəzi Neftçilər Xəstəxanasının həkimi, t.ü.f.d. Həsən İsayev isə "COVID-19 - Serebral zədələnmələrin radiodiaqnostikası” mövzusunda məruzələrlə çıxış ediblər.

Təlimdə, həmçinin serebral travmalar, serebrospinal vaskulyar malformasiyalar, neoplastik prosesler, epilepsiya və insultun müasir və invaziv radiologiyasına dair məruzələr dinlənilib, müzakirələr aparılıb.

E-təlimdə ümumilikdə 9 məruzə dinlənilib.