Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM) ilə “Marsol” Məhdud Məsuliyyətli Cəmiyyəti (MMC) arasında əməkdaşlıq əlaqələrinin qurulması məqsədilə memorandum imzalanıb. Sənədi İSİM-in direktoru Qəhrəman Haqverdiyev və “Marsol” MMC-nin direktoru Tural Mustafayev imzalayıblar.

 

Aztibb.az-ın məlumatına görə, memorandum İSİM və “Marsol” MMC arasında ikitərəfli əməkdaşlığın çərçivələrini müəyyən edir.

 

Sənədin imzalanmasında məqsəd səhiyyə və qeyri-səhiyyə sektorunda beynəlxalq, dövlət və qeyri-hökümət təşkilatları ilə əməkdaşlığın genişləndirilməsi, yeni əlaqələrin qurulması və inkişaf etdirilməsidir. Tərəflərin əməkdaşlığı ilə tibbi profilaktika tədbirlərinin həcminin artırılması, sağlam həyat tərzinin təbliği, əhalinin sağlamlığının qorunması üzrə innovativ layihələrin, tədbirlərin, forumların təşkili, eləcə də korporativ sosial münasibətlərin inkişafı istiqamətində təkliflərin hazırlanması və birgə həyata keçirilməsi nəzərdə tutulur.

 

Qeyd edək ki, “Marsol” MMC 2017-ci ildən fəaliyyət göstərir. Müxtəlif sektorlar üzrə 400-dən çox təşkilat və qurumla əməkdaşlıq edən şirkətin əsas fəaliyyət sahəsi Azərbaycan iqtisadiyyatının ayrı-ayrı istehsal və xidmət sektorunda fəaliyyət göstərən sahibkarlar arasında iş birliyinin artırılması, işgüzar əlaqələrin genişləndirilməsi və dövlət qurumlarıyla sahibkarlar arasında körpü rolunu oynamaqdır.