Bitki Mühafizəsi haqqında Beynəlxalq Konvensiyanın (IPPC - International Plant Protection Convention) katibi Osama El-Lissy ilə Avropa və Aralıq dənizi Bitki Mühafizəsi Təşkilatının (EPPO) sədr müavini Sultan-Mahmud Sultanov Qida Təhlükəsizliyi İnstitutunda olublar.

Görüşdə onlara institutun fəaliyyət istiqamətləri, beynəlxalq təşkilatlarla əməkdaşlığı, maddi-texniki bazası, qurumun tabeliyindəki laboratoriyaların işi barədə geniş məlumat verilib.

Bildirilib ki, institutun nəzdində fəaliyyət göstərən Mərkəzi Fitosanitar Laboratoriyasının əsas istiqaməti bitki, bitkiçilik məhsulları və karantin nəzarətində olan materiallarda bitkilər üçün zərərli orqanizmlərin aşkarlanması və diaqnostikasından ibarətdir. Laboratoriya tez və dəqiq diaqnostikanın təmin edilməsi məqsədilə karantin tətbiq edilən zərərli orqanizmlərin başqa dövlətlərin ərazisindən respublikamızın ərazisinə keçməsinin və yayılmasının qarşısının alınması, etibarlı sertifikatlaşdırma sisteminin dəstəklənməsi ilə ölkədə istehsal olunmuş bitki və bitkiçilik məhsullarının beynəlxalq bazarlara çıxışına dəstək verilməsi, eləcə də ölkə ərazisində fitosanitar sabitliyin təmin edilməsində mühüm rol oynayır.

Görüşdən sonra qonaqlar tanışlıq və iş prinsipini öyrənmək məqsədilə İnstitutun laboratoriyalarına baxış keçirib, laboratoriyalarda təhlükəsizlik və keyfiyyət göstəriciləri üzrə aparılan müayinə üsulları, ekspertiza və tədqiqat xidmətləri ilə yaxından tanış olublar.

Qeyd edək ki, Osama El-Lissy və Sultan-Mahmud Sultanov Bakıda keçirilən IPPC-nin Avropa və Mərkəzi Asiya üçün regional tədbirində iştirak etmək üçün Azərbaycana gəliblər.