Hemofiliyalı Xəstələrin Respublika Assosiasiyasının təşkilatçılığı ilə 27-29 avqust 2022-ci il tarixlərində keçirilən "ANA BALA-5" sağlamlıq yay düşərgəsi başa çatıb.

 

Aztibb.az xəbər verir ki, sağlamlıq düşərgəsinin bağlanış mərasimində çıxış edən Assosiasiyanın sədri Ayaz Hüseynov qanın laxtalanma pozğunluğu ilə bağlı məlumatların əldə olunması baxımından düşərgənin önəmini qeyd edib. Bildirib ki, təlimlərə məhz damardaxili inyeksiyadan başlanılıb.  Damar daxili inyeksiyanın təlimçisi Respublika Kliniki Xəstəxanasının Hematologiya şöbəsində çalışmış, 45 illik təcrübəyə malik tibb bacısı Sonaver Məhərrəmova olub. Bundan başqa, psixoloq Təhminə Rüstəmova tərəfindən valideynərə təlimlər keçirilib. Təlimin məqsədi valideynləri maarifləndirmək, onların övladları ilə bağlı probləmləri müzakirə etmək, habelə övladları ilə ünsiyyətdə yaranan çətinliklərin həlli yollarını analiz edərək valideynlərin motivasiyalarını artırmaq olub.

 

Ayaz Hüseynovun sözlərinə görə, yay düşərgəsi çərçivəsində uşaqlar üçün psixoloji müayinə də təşkil olunub və onların psixoloji durumları dəyənləndirilib.

 

Bildirilib ki, "Ana Bala-5" yay sağlamlıq Hemofiliya Məktəbində fizioterapiyaya xüsusi yer verilib. Belə ki, təlimdə hemofiliyanın verdiyi fəsadlar arasında oynaq daxili hematomalar, hemartrozlar və kontrakturaların aradan qaldırılmasında fizioterapiyanın faydaları və sosial aspektləri haqqında Respublika Kliniki Xəstəxanasının Fizioterapiya şöbəsinin müdiri Yeganə Əzizova mühazirə deyib. Həmçinin Hemofiliyalı Xəstələrin Respublika Assosiasiyasının icraçı direktoru Gülnarə Hüseynova fizioterapiyanın təkmilləşdirilməsi və əlçatanlığı sahəsində Assosiasiyanın fəaliyyəti və perspektivləri barədə çıxış edib.

 

Saglamlıq yay düşərgəsi daxili Hemofiliya Məktəbində stomatoloq Aybəniz Şahmuradova tərəfindən stomatoloji təlim və müayinələr təşkil olunub. Eyni zamanda, ilk dəfə olaraq Hemofiliya Məktəbində pediatr Təranə Cəlilova tərəfindən "Hemofiliya və somatik xəstəliklər", hematoloq Sevil Cəlilova tərəfindən isə "Trombositopatiyalar və digər laxtalanma pozğunluqları” mövzusunda təlimlər keçirilib.  

Həmçinin "ANA BALA-5" sağlamlıq yay düşərgəsinin qonaqları TƏBİB-in Tibbi Xidmətlərin Təşkili departamentinin əməkdaşları Romella Osmanova və Səkinə Əzizli olublar.

 

Sonda sağlamlıq yay düşərgəsi daxili Hemofiliya Məktəbində keçirilən seminar iştirakçılarına sertifikatlar təqdim edilib.