Əgər qan təzyiqinizə nəzarət etmirsinizsə, böyük səhv edirsiniz. Hətta özünüzü əla hiss edirsiniz və hipertoniya heç vaxt sizə problem yaratmayıbsa belə vəziyyət hər an dəyişə bilər.

Aztibb.az medikforum.ru-ya istinadla xəbər verir ki, rusiyalı həkim endokrinoloq Arina Tertışnaya təzyiqə nəzarət etməyin niyə bu qədər vacib olduğunu və bu məsələyə məhəl qoymamağın hansı nəticələrə səbəb ola biləcəyindən bəhs edib.

“Hazırda cəmiyyətimizdə qan təzyiqinə nəzarət etməmək insanlar üçün ən təhlükəli yanaşmadır. Əksəriyyət ilk siqnallara məhəl qoymamağa öyrəşib və təzyiq yüksələndə bunun öz-özünə keçəcəyini düşünürlər”.

Arina Tertışnaya bildirib ki, hipertəzyiq bədəndəki digər ciddi nasazlıqların siqnalı ola bilər. Yüksək qan təzyiqi müstəqil bir xəstəlik deyil, bir simptomdur.

Barmağımızı öz nəbzimizdə saxlamaq niyə vacibdir? Çünki hipertoniyanın ilk mərhələlərində hələ də vəziyyəti dərman istifadə etmədən düzəltmək olar.⠀

Həkimin sözlərinə görə, əksər hallarda həyat tərzini tənzimləmək, pəhrizi nəzərdən keçirmək və pis vərdişlərdən imtina etmək kifayətdir. Məsələn, siqareti tərgitmək çöx önəmlidir. Bəzi hallarda hipertəzyiqin səbəbləri müntəzəm olaraq çox artıq qida qəbul etmək, pəhrizdə həddindən artıq duz, spirtli içkilər, az hərəkətlilik və ya tamamilə hərəkətsizlikdir.

"Mütəmadi olaraq təzyiqin yüksəldiyini görürsünüzsə, mütəxəssisə müraciət etməlisiniz. Səbəbini mümkün qədər tez tapmaq vacibdir. Səbəbi müəyyənləşdirməkdə sizə terapevt və ya kardioloq kömək edəcək", - deyə mütəxəssis əlavə edib.