Əhalinin sağlamlığının qorunması, qida təhlükəsizliyi sahəsində laboratoriya sisteminin inkişafı ilə əlaqədar Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən laboratoriyaların maddi-texniki bazasının gücləndirilməsi, eləcə də modernləşdirilməsi istiqamətində mütəmadi olaraq tədbirlər həyata keçirilir. Həmçinin laboratoriyalarda qabaqcıl texnologiyaların tətbiqi və kadrların səriştəliliyinin artırılması üçün təlimlərdə və beynəlxalq laboratoriyalararası səriştəlilik sınaqlarında iştirakı təmin edilir.

İnstitutun İctimaiyyətlə əlaqələr və maarifləndirmə departamentindən verilən məlumata görə, həmin tədbirlər çərçivəsində AQTİ-nin Milli Referens Laboratoriyası İngiltərənin "Fapas" şirkəti tərəfindən təşkil edilən səriştəlilik sınağında iştirak edib. Belə ki, 50-dən artıq xarici laboratoriyanın da iştirak etdiyi səriştəlilik sınağı çərçivəsində laboratoriyada fındıq məhsulunda Aflatoksin B1, ümumi aflatoksin (B1, B2, G1, G2) və Oxratoksin A parametrləri üzrə sınaqlar maye xromotoqrafiya cihazında müayinə edilib. Sınaq zamanı əldə olunan göstəricilərə əsasən laboratoriya yüksək nəticə əldə edib və səriştəlilik sınağından uğurla keçib.

Qeyd edək ki, indiyədək sınaq laboratoriyası müxtəlif müayinələr üzrə beynəlxalq “Laboratoriyalararası müqayisə” sınaqlarında iştirak edərək uğurlu nəticə göstərən laboratoriyalar sırasında yer alıb. Həmçinin laboratoriya Almaniyanın nüfuzlu akkreditasiya qurumu olan Deutsche Akkreditierungsstelle GmbH tərəfindən beynəlxalq akkreditasiyadan keçirilib.