O, bildirib ki, ən əsası, bu bitkinin xoşagələn bir dadı vardır. Təzyiqi saldığından bəzi adamlar içməkdə problem yaşaya bilərlər. Bunu aradan qaldırmaq üçün 1 çay qaşığı məkkəgülü 1 stəkan suda dəmləndikdən sonra süzülür, bir qədər soyuduqda dəmləməyə 1 dolu çay qaşığı bal qarışdırılaraq içilir. Bal içkinin faydalı təsirlərini bir qədər də artırmış olur. Dəmləmə soyuq halda içiləndə məkkəgülü şərbəti adlandırılır. Məkkəgülü şərbəti güclü antioksidantdır, xərçəngəleyhinə təsiri var, immuniteti gücləndirir, yüksəlmiş xolesterini aşağı salır.

 

 

300 qram məkkəgülü 3 litr adi suda 5-6 saat saxlanılır, sonra süzülür. Məkkəgülünün həm dadı, həm də rəngi suya keçir, sonra üzərinə 4 litr su və zövqə görə limon, darçın və ya zəncəfil əlavə edilir. Şərbətin dadını yaxşılaşdırmaq üçün bal və ya şəkər tozu qarışdırıb içmək olar. Çox dadlı və susuzluğu yaxşı yatıran bir içki alınır.

 

"Məkkəgülü çayını və ya şərbətini yeməkdən sonra içmək məsləhətdir, çünki mədəyə qıcıqlandırıcı təsiri ola bilər. Qastritlər zamanı içilməsi məsləhət deyil. Hamiləlikdə və südvermə zamanı çox az istifadə olunmalıdır", deyə həkim məkkəgülü çayından istifadə edərkən insanları müəyyən məqamları diqqətdə saxlamağı tövsiyə edib.