Sumqayıt Tibb Mərkəzinin (STM) tabeliyində olan 3 nömrəli Ailə Sağlamlıq Mərkəzində (ASM) “Ana südü ilə qidalandırmanın vacibliyi və üstünlükləri” mövzusunda tədbir keçirilib.

Tədbirdə TƏBİB-in İlkin səhiyyə xidmətinin təşkili şöbəsinin müdiri Nəhmət Rəhmanov, həmin şöbənin mütəxəssisi Səkinə Əzizli, BMT-nin Uşaq Fondunun (UNİCEF) Bakı ofisinin nümayəndəsi Vəfa Ağayeva, Sumqayıt Tibb Mərkəzinin direktor müavini, İlkin səhiyyə xidmətinin rəhbəri İlkin Namazov, 3 nömrəli ASM-in baş həkimi Maisə İsmayılova iştirak edib.

Tədbiri giriş sözü ilə açan 3 nömrəli ASM-in baş həkimi Maisə İsmayılova iştirakçıları salamlayıb və mövzunun əhəmiyyətindən danışıb.

TƏBİB-in İlkin səhiyyə xidmətinin təşkili şöbəsinin müdiri Nəhmət Rəhmanov ilkin səhiyyə xidmətinin təkmilləşdirilməsi istiqamətində atılan addımlardan, həyata keçirilən islahatlardan söz açıb. Bildirib ki, bu sahədə müvafiq keyfiyyət standartları hazırlanıb və xidmətin keyfiyyətinin yüksəldilməsi istiqamətində bundan sonra da tədbirlər davam etdiriləcək.

BMT-nin Uşaq Fondunun (UNİCEF) Bakı ofisinin nümayəndəsi Vəfa Ağayeva "Kiçik yaşlı uşaqların qidalanması" mövzusunda təqdimatla çıxış edərək bildirib ki, yenidoğulmuşlar və körpələr üçün ən yaxşı qida ana südüdür. Ana südü lazımi miqdarda qida maddələrinə malikdir və asanlıqla həzm olunur.

V. Ağayeva qeyd edib ki, körpə doğulandan ilk 6 ayına qədər yalnız ana südü ilə qidalanmalıdır. O, vurğulayıb ki, 6 aydan sonra 2 yaşına qədər və ondan sonrakı müddətdə də əlavə qidalar da olmaqla yanaşı ana südü davam etdirilməlidir.

Analara və yenidoğulmuşlara tibbi xidmət göstərən müəssisələrin əməkdaşlarının qatıldığı tədbirdə müzakirələr aparılıb, iştirakçıları maraqlandıran suallar cavablandırılıb.