Ağır ishal və qusma zamanı uşaq xeyli miqdarda su, onunla birlikdə isə mineral duzları itirir. Bu hal orqanizmin susuzlaşması adlanır. Uşaqda bədənin güclü şəkildə susuzlaşması çox qısa bir müddət ərzində onun sağlamlığına ciddi ziyan vura bilər. 

Aztibb.az-ın xəbərinə görə, həkim pediatr Günay Rəsulova qusan və qarnı gedən uşağa ev şəraitində edilən səhv müdaxilələrdən danışıb. Həkimin sözlərinə görə, birinci növbədə, uşağın mədə-bağırsağını çobanyastığı, sodalı su və digər məhlullarla yumağa çalışmaq ona stres verməkdən başqa bir işə yaramır. İkinci növbədə, qaytaran uşağı çöpçüyə aparmaq ən çox buraxılan səhvlərdəndir.

Eyni zamanda qaytaran uşağa israrla dərman içirməyə və ya onu yedizdirməyə çalışmaq olmaz. Çətin həzm edilən və uyğun olmayan qidaların təklif edilməsi də qusmanın  artmasına və uşağın daha da narahat olmasına səbəb olur. 

G.Rəsulova bildirib ki, əgər övladınız qaytarırsa, az miqdarda maye içizdirmək lazmıdır. Azyaşlılarda xüsusilə elektrolit itkisinə yaxından nəzarət etmək lazımdır. Bir neçə saat uşağın mədə-bağırsağına dinclik vermək mütləqdir. Onu məcbur qidalandırmaq qətiyyən tövsiyə edilmir. 

"Uşaq suyu belə qaytarırsa, bu zaman onu təcili olaraq həkimə aparmaq lazımdır", - deyə həkim əlavə edib.