TƏBİB-in tabeliyində olan Elmi-Tədqiqat Travmatologiya və Ortopediya İnstitutunda Vətən müharibəsi qazisi İbrahim Hüseynova sinir nəqli əməliyyatı edilib.
Aztibb.az xəbər verir ki, institutun direktoru Elviz Qasımovun rəhbərliyi ilə əməliyyat travmatoloq-cərrah Tofiq Abdullayev tərəfindən icra edilib.
Ağdərə istiqamətində gedən döyüş zamanı İ.Hüseynovun aldığı qəlpə yarası nəticəsində sol topuq nahiyəsində sinir zədələnməsi baş verib. İnstitutda həkim müayinəsi nəticəsində qaziyə sol tibial sinirin köhnə zədələnməsi, sinir defekti, nevrinoma diaqnozu qoyulub.
Adıçəkilən diaqnozlar səbəbilə sol ayağında hissiyatı itirən, şiddətli ağrıları olan və barmaqlarında hərəkətsizlik yaranan qazinin əməliyyatı 7 saata yaxın davam edib. Əməliyyat zamanı sağ ayaqdan alınan sinir götürülərək, sol ayağa transplantasiya edilib.
Əməliyyatın ilk nəticəsi kimi qazinin ayaq barmaqlarında hərəkət funksiyası bərpa olunub. İ.Hüseynovun bundan sonrakı bərpa müddəti də həkim nəzarətində davam etdiriləcək.
