Şmorl yırtıqları - fəqərə cisimlərinin yırtıqları - daha çox gənc yaşlarda rast gəlinir. Bu yırtıqların tək-tək rast gəlinən formaları osteoxondrozun və ya travmanın olmasından xəbər verir.

Tanınmış reabilitoloq, fizioterapevt, idman zədələri üzrə mütəxəssis, osteopat Pərvin Əkbərov bu barədə məlumat verərək çox hallarda şmorl yırtıqlarının simptomsuz olduğunu və rentgenoloji  müayinələr zamanı təsadüfən aşkar edildiyini bildirib. Onun sözlərinə görə, şmorl yırtığı (Şmorl düyünü) rentgenoloji  termin olub, fəqərəarası diskin daha çox məşhur olan onurğa beyin kanalına və ya sinir dəliklərinə nüfuz edən üfüqi  yırtıqlarından fərqli olaraq, qapayıcı  lövhəciyin qığırdaq toxumasının sümüyün süngər maddəsinə, yuxarı  və ya  aşağı  fəqərə cisminin daxilinə nüfuz etməsidir:

"Ən çox irsi xarakter daşıyır və ya uşağın sürətli  böyüməsi zamanı  uşaqlıq dövründə təzahür edir. Uşağın boyu artdıqca, yumşaq toxumalar da böyüməyə imkan tapır, lakin sümük toxumasının inkişafı  bir qədər geri qalır. Nəticədə, fəqərə cisminin süngər maddəsində boşluqlar yaranır ki, vaxt keçdikcə buraya qığırdaq toxuması daxil olur. Şmorl yırtıqları  daha çox fəqərə sütununun döş və bel şöbələrində (kürəyin  orta və ya aşağı  hissəsində) rast gəlinir".