Tanınmış reabilitoloq, fizioterapevt, idman zədələri üzrə mütəxəssis, osteopat Pərvin Əkbərov bu barədə məlumat verərək  bildiirb ki, onurğamız bədənimizin ağırlığını daşıyan, eyni zamanda beyindən çıxaraq bütün bədənə gedən sinirləri qoruyan bir quruluşdur.

 

Həkim qeyd edib ki, onurğamızın boyun hissəsi bir -birinin üstündə düzülmüş onurğa adlanan 7 sümükdən və onların arasında yerləşən fəqərəarası disk adlanan yastıqlardan ibarətdir. Fəqərəarası disklərin vəzifəsi yükü yuxarı tərəfdən udmaq və aşağı fəqərəyə bərabər şəkildə ötürmək, həmçinin fəqərənin hərəkətini faset adlanan birləşmə ilə təmin etməkdir. Bu xarici təbəqəsinin hər hansı bir səbəbdən zədələnməsi nəticəsində içindəki jele bənzər hissə bütün bədənimizə dağılan sinirlərin onurğada yerləşdiyi yerə daşır. Bu şəkildə həm sinirləri sıxır, həm də jele bənzər təbəqənin kimyəvi təsiri ilə sinirləri qıcıqlandırır. Sərbəst buraxılan kimyəvi maddələrin qıcıqlandırıcı təsiri səbəbiylə boyun ağrısı, sinirlərin sıxılması nəticəsində qollarda uyuşma, qıcıqlanma və güc itkisi meydana gələ bilər. Bu xəstəlik şəklinə “boyun yırtığı“, yəni “servikal disk yırtığı” deyilir.

 

Ağır yüklərin qaldırılması, daima uyğun olmayan vəziyyətdə çalışması (məsələn, stolüstü işlərdə) və boynuna və ya başına zərbə vurulması boyun yırtığının əmələ gəlməsində əsas faktorlardır.

 

P.Əkbərov onu da bildirib ki, boyun yırtığında ciddi nevroloji defisiti olmayan xəstələrin 95%-də cərrahiyyə tətbiq olunmadan yaxşılaşma müşahidə olunur. Boyunda davamlı ağrı, qollarda keyləşmə və zəiflik varsa mütləq həkimə müraciət etməyiniz məsləhət görülür.