Sumqayıt Tibb Mərkəzinin keçirdiyi səyyar tibbi aksiya başa çatıb, 200-ə yaxın ahıl müayinə edilib.

“İcbari tibbi sığorta ilə sağlam yaşa!” şüarı adı altında Sumqayıtın Hacı Zeynalabdin, Corat qəsəbələrində və “Stansiya Sumqayıt” yaşayış massivində səyyar tibbi aksiya keçirilib.

Sumqayıt Tibb Mərkəzinin (STM) təşkilatçılığı ilə keçirilən və üç gün davam edən aksiyada terapevt, oftalmoloq, kardioloq, LOR və USM mütəxəsissləri tərəfindən 65 yaş və yuxarı yaş qruplarından olan 200-ə yaxın vətəndaşın müayinəsi həyata keçirilib.
Müayinələr zamanı səhhətində problem müşahidə olunan vətəndaşlara müvafiq tövsiyələr verilib, tibbi göstərişlərə əsasən STM-in tabeliyində olan digər tibb müəssisələrinə istiqamətləndirilib.

Aksiyanın keçirilməsində əsas məqsəd, şəhərdən kənarda yerləşən yaşayış məntəqələrində yaşayan ahıl insanların tibbi xidmətə əlçatanlığını təmin etməkdir.

Qeyd edək ki, tibbi aksiya zamanı aparılan müayinələr icbari tibbi sığorta çərçivəsində tamamilə ödənişsiz şəkildə həyata keçirilib.