Sumqayıt Tibb Mərkəzinin tabeliyində olan Perinatal Mərkəzdə simulyasion avadanlıqla endoskopik cərrahiyyə üzrə təlimlərə start verilib.

Aztibb.az-ən məlumatına görə, Perinatal Mərkəzin təlim mərkəzində təşkil edilən təlim 3 gün davam edəcək.

Təlimdə Sumqayıt Tibb Mərkəzinin mama-ginekoloqları, uroloq və cərrahları iştirak edirlər.

Təlim "Karl Storz" tibbi avadanlıq istehsalçısının Azərbaycan Respublikasında nümayəndəliyinin direktoru Taley Bəşirov tərəfindən aparılır.
İştirakçılara simulyasiyon avadanlıqlardan düzgün istifadə qaydaları və texniki laproskopiya vərdişləri öyrədilir.

Qeyd edək ki, təlimin ilk günündə Sumqayıt Tibb Mərkəzinin direktoru Səkinə Sadıxova, Sumqayıt şəhər İcra hakimiyyəti Başçısının müavini Ülviyyə Müzəffərova və Perinatal mərkəzin baş həkimi Təranə Rəcəbli iştirak edərək tibb heyətinə uğurlar arzulayıblar. Onlar bu kimi təlimlərin ixtisaslı həkimlərin bilik və bacarıqlarının artırılmasında vacibliyini vurğulayıblar.