Azərbaycanın Xalq artisti, professor Sevda İbrahimova uzun sürən xəstəlikdən sonra 83 yaşında vəfat edib.

Qeyd edək ki, S.İbrahimova tarzən, Xalq artisti Qurban Primovun nəvəsi və görkəmli dramaturq, Xalq yazıçısı Mirzə İbrahimovun və pianoçu Sara Primovanın qızıdır.

Xalq artistinin milli və klassik musiqimizin inkişafında böyük xidmətləri olub. Bülbül adına Musiqi Məktəbini fərqlənmə diplomu ilə bitirən Sevda İbrahimova iki ali musiqi təhsili almışdı. O, Azərbaycan Dövlət Konservatoriyasının fortepiano və bəstəkarlıq fakültəsini bitirmişdi.

S.İbrahimova iki operanın, beş fortepiano konsertinin, orqan, tar və orkestr üçün konsertlərin, kantataların, kamera-instrumental və vokal kompozisiyalarının, fortepiano solo üçün çoxsaylı silsilələrin, uşaqlar üçün müxtəlif janrlı əsərlərin, filmlər və tamaşalar üçün musiqilərin müəllifi idi. Bəstəkarın əsərləri təkcə ölkəmizdə deyil, ABŞ, Fransa, İsveç, Almaniya və dünyanın digər ölkələrinin konsert salonlarında səslənir.

Allah rəhmət eləsin!