Tibbi Ərazi Bölmələrini İdarəetmə Birliyi (TƏBİB) tərəfindən Elmi-Tədqiqat Mamalıq və Ginekologiya İnstitutuna yönləndirilən hamilə qadın əkiz körpələrinə qovuşub.

Aztibb.az TƏBİB-in rəsmi feysbuk səhifəsinə istinadla bildirir ki, ilk hamiləliyində 28 həftəlik doğulan körpəsini itirən qadın TƏBİB-in Tibbi fəaliyyətin təşkili departamentinin koordinatoru və Elmi-Tədqiqat Mamalıq və Ginekologiya İnstitutunun mama-ginekoloqu Hicran Kazımovanın xüsusi nəzarəti altında olub.

Hamilə qadın 9 ay müddətində həkim nəzarətində olduqdan sonra, institutun birinci Mamalıq şöbəsinin müdiri Kəmalə Heydərova tərəfindən icbari tibbi sığorta çərçivəsində icra olunan qeysəriyyə kəsiyi əməliyyatı ilə əkiz qız övladlarını sağlam dünyaya gətirib.

Çəkiləri 2 kilo 330 və 2 kilo 200 qram olan əkiz körpələr Yenidoğulmuşların Reanimasiya və İntensiv Terapiyası şöbəsinin həkim-neonatoloqları və tibbi heyəti tərəfindən lazımi bütün müayinə və müalicələrlə təmin ediliblər. Zahı qadın da 12 gün müddətində Zahılıq şöbəsində nəzarətdə olub, lazımi bütün tibbi xidmətlərlə təmin olunub.