Pediatrlara ən çox ünvanlanan suallardan biri də uşaq, xüsusilə 40 günlük körpələrlə səyahətə çıxmaqla bağlıdır. Bu nüans bir çox valideynləri narahat edir. Bəs yenidoğulmuş ilə uzaq yola çıxarkən nələrə diqqət edilməlidir?

Aztibb.az xəbər verir ki, həkim-pediatr Günay Rəsulova yenidoğulmuş körpə ilə səyahətə çıxmaq istəyən valideynlərə mühüm tövsiyələr verib. Həkim bildiirb ki, əlbəttə ki, körpə ilə səyahətə çıxmaq mümkündür. Lakin bu zaman bir neçə məqama ciddi diqqət yetirilməlidir:

"Birinci növbədə, ictimai nəqaliyyatdan istifadə edilməməlidir. İkincisi, şəxsi avtomobildə belə, kondisionerin isitməsi və ya soyutmasını düzgün tənzimləmək lazımdır. Üçüncüsü, gedilən məkanlarda körpəni tünlük olan yerlərdən, insanlarla təmasdan uzaq tutmaq lazımdır. Bu, xəstəlik və infeksiyalaşma riskini artırır. Dördüncüsü isə, səyahətə çıxarkən körpə üçün lazım olan bütün ləvazimatları aparmaq lazımdır. Buraya, termometr, qızdırmasalıcı dərman, allergiya əlaeyhinə preparat, qarın ağrısı və ya qusma əleyhinə vasitələr, ağrıkəsici, qəbzlik əlayehinə şam, bint və s. aiddir".