Elmi-Tədqiqat Mamalıq və Ginekologiya İnstitutunda Vətən müharibəsi iştirakçısı olmuş şəhid həkim, tibb xidməti leytenantı Turqut Xəlilbəylinin doğum gününə həsr olunmuş tədbir keçirilib.

Əvvəlcə Vətən müharibəsi şəhidlərinin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Tədbiri giriş sözü ilə institutun direktoru, professor Cəmilə Qurbanova açaraq şəhid-həkim Turqut Xəlilbəylinin timsalında Vətən müharibəsində qəhrəmanlıq və şücaət göstərərək öz adlarını tariximizə yazan tibb işçilərini anmağın hamımız üçün qürurverici olduğunu vurğulayıb. O, Vətən müharibəsi şəhidi Surxay Noçuyev və I Qarabağ müharibəsi şəhidi Hidayət Mirzəyevin ailə üzvlərinin neçə illərdir institutda çalışdığını diqqətə çatdırıb. 

Daha sonra TƏBİB-in Tibbi fəaliyyətin təşkili departamentinin koordinatoru Hicran Kazımova 44 günlük Vətən müharibəsində şəhidlik zirvəsinə ucalan oğullarımızın qəhrəmanlıqlarından danışıb, şəhid adının müqəddəsliyini qeyd edib, onların xatirəsinin xalqımızın yaddaşında əbədi yaşayacağını bildirib.

Azərbaycan ordusunun şanlı qələbəsindən və beynəlxalq terrorizmin şəbəkəsini darmadağın etməsindən danışan Elmar Qaçabəyov heç zaman işğalçılığın vətənsevərliyə, vətənpərvərliyə qalib gələ bilməyəcəyini vurğulayıb.

Tədbirdə ETMGİ-nin YAP təşkilatının sədri Ədalət Əliyev Qarabağın azadlığı uğrunda illərdir aparılan mübarizədən bəhs edib, Müzəffər Ali Baş Komandanın rəhbərliyi ilə başa çatan Vətən müharibəsindən və şəhidlərin şərəfli ömür və döyüş yolundan danışıb.

Sonra çıxış edən ETMGİ-nin elmi katibi, t.ü.f.d., dosent Aynurə İsmayılova şəhidlərin hər zaman bizim fəxr yerimiz, qürür mənbəyimiz olduğunu deyib. O, belə tədbirlərin mütəmadi keçirilməsinin vacibliyini qeyd edib.

Mama-ginekoloq Tünzalə Hacıyeva Qarabağın azadlığı uğrunda şəhid olan həkim və tibb işçilərinin peşələrinin öhdəsindən hər zaman ləyaqətlə gəldikləri kimi, heç düşünmədən öz canları bahasına neçə-neçə hərbçilərimizi xilas etmələrindən, çətin müharibə şəraitində böyük məsuliyyət ilə vəzifələrini layiqincə icra etmələrindən söz açıb.

Daha sonra İnstitutun rəhbərliyi həkim və tibb heyəti ilə birlikdə II Şəhidlər xiyabanı ziyarət edərək, şəhidlərin məzarları üzərinə qərənfillər düzüb, şəhidlərimizin unudulmaz xatirəsi hörmət və ehtiramla anıblar.