Aztibb.az xəbər verir ki, pediatr-neanotoloq Nurəngiz Hacıyeva bu barədə məlumat verərək bildirib ki, dəcəl uşaq - sinir sisteminin bir forması kimi dəyərləndirilir. Tibdə sanqviniklər kimi adlanır. Bunlar şəndirlər, enerjiləri çoxdur və həmin enerjini onlar sərf etməlidir:

 

"Təbii ki, bütün günü evdə oturan uşaq divana, tavana dırmaşacaq, hər yeri eşələyəcək, evi dağıdacaq. Amma sual verəndə dinləyirlər, onlar üçün maraqlı olanda səbirlə qulaq asacaqlar. Belə uşaqların enerjisini sərf etmək üçün bağçaya, idmana, müəyyən məşqlərə, dərnəklərə yönəldin, televiziya - telefona yox. Çünki 6 aydan telefonla oynayan uşaqlarda tədricən autik spektrlər inkişaf edir".

 

Həkimin sözlərinə görə, diqqət əskikliyi olan - hiperaktiv uşaqlar (daha çox irsi olur) 1 dəqiqə belə yerində dayanmayan, unutqan, tez-tez əşyalarını itirirən və diqqətsiz olurlar. Sual verəndə, yaxud oyun zamanı öz sıralarını gözləməyi sevmirlər. Kimsə danışanda araya girirlər, hər şeyə ifrat reaksiya verirlər, bəzən yalan söyləmək kimi hallar da müşahidə olunur. Böyüdükcə, bir əsəri axıra qədər oxuyub qurtara bilmirlər, 1-2 səhifə oxuyub axırın necə qurtaracağını bilmək üçün son səhifəyə keçirlər. Hətta özləri verdikləri sualın cavabına axıra qədər dözüb qulaq asmağı bacarmırlar. Əgər müəyyən yaş dövrünə qədər müalicə olunmazlarsa, bu natamam davranışlar onları bir ömür boyu təqib edir. Valideynlər belə uşaqla səbrlə, mülayim davranmalı, açıq havada gəzdirməli, su ilə, qum ilə oynamalıdırlar. Yanaşı seanslara getməlidirlər.

 

"Uşaqda hiperaktivlik əlamətləri mikroelement, sink, dəmir çatışmazlığından da ola bilər", - deyə həkim əlavə edib.