27-28 iyun 2022-ci il tarixlərində Gürcüstanın paytaxtı Tbilisi şəhərində Ümumdünya Səhiyyə Təşkilatının (ÜST/WHO) və Birləşmiş Millətlər Təşkilatının Ətraf Mühit Proqramının (BMƏMP/UNEP) təşkilatçılığı ilə Mərkəzi və Şərqi Avropa regionunda qurğuşun boyalarına dair normativ sənədlərin hazırlanması və tətbiqi mövzusunda ekspertlərin regional görüşü keçirilib.

Azərbaycan Respublikasını görüşdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev təmsil edib.

Tədbirdə Mərkəzi və Şərqi Avropa regionu ölkələrinin hökumət və qeyri-hökumət təşkilatlarının, Ümumdünya Səhiyyə Təşkilatının, UNEP-in və Birləşmiş Millətlər Təşkilatının digər qurumlarının, Qurğuşun boyalarının qadağan edilməsi üzrə Qlobal Alyansın nümayəndələri iştirak ediblər.

Görüşdə tərkibində qurğuşun olan boyaların insan sağlamlığına mənfi təsiri ilə bağlı aktual məsələlər, boyalarda qurğuşun miqdarının tənzimlənməsi və ona nəzarət sahəsində region ölkələrinin əldə etdiyi nailiyyətlər, eləcə də bu istiqamətdə atılacaq növbəti zəruri addımlar müzakirə olunub.

Azərbaycanda qurğuşun boyalarının tənzimlənməsinin hazırkı vəziyyəti və bu sahədə əldə olunan irəliləyişlər barədə tədbirdə ətraflı məruzə ilə çıxış edən Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev daha sonra dinləyicilərin çoxsaylı suallarını cavablandırıb.

Mərkəzi və Şərqi Avropa regionunun müxtəlif ölkələrindən olan görüş iştirakçıları, eləcə də ÜST, UNEP və digər beynəlxalq təşkilatların ekspertləri öz çıxışlarında Azərbaycanın qısa müddətdə qurğuşun boyalarına dair normativ sənədlərin hazırlanmasında əldə etdiyi irəliləyişdən məmnunluq ifadə ediblər, bu məsələdə öz ölkələri üçün Azərbaycanın təcrübəsini yol xəritəsi kimi qəbul etmək istəklərini bildiriblər.