Qusar rayonda piyadanın vurulması nəticəsində ağır vəziyyətdə Kliniki Tibbi Mərkəzə yerləşdirilən və 8 gün komada olan yeniyetmə artıq sağlamlığına qovuşub.

 

Bu barədə Aztibb.az-a Kliniki Tibbi Mərkəzdən məlumat verilib.

 

Bildirilib ki, gətirilərkən süni tənəffüs aparatında olan və qəzadan sonra komaya düşən, Mərkəzin üç fərqli şöbəsində çoxsaylı tibbi müdaxilələr görən yeniyetmə üçün hazırda hər hansı həyati təhlükə yoxdur.

 

 

Yaxınlarının sözlərinə görə, 2010-cu il təvəllüdlü məktəbli 27 may tarixində dərsdən çıxıb, marketə gedərkən yolda maşın vurub. 

 

Yeniyetmənin nənəsi Seçmə Maverdiyeva bildirib ki, hadisədən xəbərləri olan kimi onu Qusar Rayon Mərkəzi Xəstəxanasına çatdırdıq. Xəstəxanada nəvəmə ilkin tibbi yardım göstərildi. Vəziyyəti çox ağır olduğu üçün o, təcili tibbi yardım maşını ilə Kliniki Tibbi Mərkəzə gətirildi: "Burada nəvəmi birbaşa Reanimasiya şöbəsinə yerləşdirdilər. Onun vəziyyəti o qədər ağır idi ki, həyatda qalmağına ümidimiz heç yox idi. Amma buradakı həkimlərin sayəsində nəvəm sanki yenidən həyata gəldi. Onların hər birinə “çox sağ ol” deyirəm, nə yaxşı ki, belə həkimlərimiz var. Bütün xərclərimiz icbari tibbi sığorta tərəfindən qarşılandı. Bu qədər xərci qarşılamağa bizim imkanımız yox idi. Bu şəraiti yaradanlara minnətdarıq”.