Fövqəladə Hallar Nazirliyi (FHN) tərəfindən Bakı şəhəri, Nərimanov rayonu, Y.Bakuvi küçəsi, 18 ünvanında yerləşən “Buta” klinikasının fəaliyyəti dayandırılıb.
Aztibb.az-ın xəbərinə görə, FHN-in Dövlət Yanğın Nəzarəti Xidməti tərəfindən “Buta” klinikasında aparılmış yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.
Nazirlikdən verilən məlumata görə, klinikada yanğınların söndürülməsi üçün normaya uyğun yanğın su hovuzu inşa edilməyib, obyektin bəzi sahələrində elektrik təchizatı və elektrik qurğuları müvafiq qaydaların tələblərinə uyğun quraşdırılmayıb, elektrik təsərrüfatı və elektrik qurğularına profilaktik baxış keçirilməyib və nöqsanların aradan qaldırılması istiqamətində tədbirlər görülməyib, eləcə də obyekt ilkin yanğınsöndürmə alət və vasitələri ilə tam təmin olunmayıb, təxliyə çıxışları tikinti-layihə normalarının tələblərinə uyğun quraşdırılmayıb.
Bundan başqa, klinikada yanğın təhlükəsizliyi qaydalarına zidd olaraq, binaya yaxın məsafədə oksigen balonlarının saxlanılmasına yol verilir, yanğına qarşı sistem və qurğular nasaz vəziyyətdədir.
Qeyd olunub ki, binanın fasad hissəsində yanğın təhlükəsizliyinə dair uyğunluq sertifikatları təqdim edilmədən alkapon üzlük materiallarından istifadə edilib.