YAP Binəqədi rayon təşkilatının M.Ə.Rəsulzadə qəsəbəsi, H.Məmmədquluzadə küçəsi 3 ünvanlı ərazi partiya təşkilatında 17 iyun - Tibb İşçilərinin Peşə Bayramı Günü münasibətilə tədbir keçirilib.

Tədbirdə YAP Binəqədi rayon təşkilatının sədri Vüsar İsmayılov, TƏBİB-in Tibbi fəailiyyətinin təşkili departamentinin rəhbəri Teymur Mirzəbəyli, Ə.D.Məlikov adına Binəqədi Tibb Mərkəzinin direktoru Əsədulla Sultanov, Binəqədi rayonunda fəaliyyət göstərən tibb işçiləri iştirak ediblər.

Tədbiri giriş sözü ilə açan Ə.D.Məlikov adına Binəqədi Tibb Mərkəzinin direktoru Əsədulla Sultanov Azərbaycan Respublikasının Prezidenti İlham Əliyevin səhiyyə sahəsinə diqqət və qayğısından, paytaxtla yanaşı bölgələrdə də səhiyyənin inkişafı istiqamətində görülən işlərdən, həyata keçirilən islahatlardan danışıb.

TƏBİB-in Tibbi fəailiyyətinin təşkili departamentinin rəhbəri Teymur Mirzəbəyli çıxışında qeyd edib ki, tibb müəssisələrinin fəaliyyətinin daha da yaxşılaşdırılması, tibbi xidmətin müasir tələblər səviyyəsinə qaldırılması, Azərbaycanda əhalinin sağlamlığının qorunması istiqamətində təxirəsalınmaz tədbirlər görülür və yeni imkanlar yaradılır.

Tədbirə yekun vuran YAP Binəqədi rayon təşkilatının sədri Vüsar İsmayılov bütün sahələrdə müşahidə olunan nailiyyətlərin səhiyyə sahəsindən də yan keçmədiyini vurğulayıb. Yeni Azərbaycan Partiyasının üzvlüyündə səhiyyə işçilərinin fəal təmsilçiliyindən bəhs edərək, bütün tibb işçilərini peşə bayramı günü münasibətilə təbrik edib.

Sonda fəaliyyətində fərqlənən bir qrup tibb işçisinə Təşəkkürnamə və hədiyyələr təqdim edildi.