Bu gün Azərbaycanda tibb işçilərinin peşə bayramıdır.
Aztibb.az xəbər verir ki, bununla əlaqədar səhiyyə naziri Teymur Musayev başda olmaqla tibb ictimaiyyətinin nümayəndələri Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə gül dəstələri qoyublar.
Görkəmli oftalmoloq alim, akademik Zərifə xanım Əliyeva, böyük alim, ictimai-siyasi xadim, səhiyyə təşkilatçısı Əziz Əliyev və tanınmış elm xadimi Tamerlan Əliyevin də xatirəsi ehtiramla anılıb, məzarları üstünə tər çiçəklər düzülüb.
Sonra Şəhidlər xiyabanı ziyarət edilib, Azərbaycanın müstəqilliyi və ərazi bütövlüyü uğrunda canlarından keçmiş Vətən övladlarının xatirəsi ehtiramla anılıb, məzarları üzərinə gül dəstələri qoyulub.
