Amerikanın 15 ştatında və Kolumbiya dairəsində 45 yoluxma halı qeydə alınıb. Virusun endemik olduğu Afrika qitəsinin xaricində, 30-a yaxın ölkədə 1300-dən çox yoluxma halı aşkar edilib.
Administrasiya rəsmiləri Amerika ictimaiyyəti üçün riskin az olduğunu bildiriblər. Bununla bərabər səhiyyə sisteminin bu tipli epidemiyaya qarşı mübarizə apara biləcəklərini təmin etmək üçün hazırlıq işlərinin getdiyini qeyd ediblər. “Jynneos” adlı iki dozalı peyvənd ABŞ-da meymunçiçəyi üçün rəsmi qurumlar tərəfindən təsdiqlənib.
Hazırda ABŞ-da 72 min “Jynneos” dozasının mövcud olduğu bildirilib. Növbəti bir neçə həftə ərzində ABŞ hökuməti istehsalçısı “Bavarian Nordic” şirkətindən 300 mindən artıq peyvənd dozası alacaq. Bunu hökumətin təcili peyvənd və müalicə ehtiyatına nəzarət edən Doun O'Konnell deyib.
