Osteopat:

Osteopat: "Ciddi kifoz əyrilikləri tənəffüs problemlərinə səbəb ola bilər"

06.06.2022 15:29

Kifoz onurğa sütununun yuxarı hissəsinin normaldan daha yuvarlaq görünməsinə səbəb olan və hər yaşda görülə bilən xəstəliyidir. Onurğa sütununun yandan görünüşü körpəlikdən qocalığa daim dəyişir. Yeni doğulan körpənin onurğa sütunu birinci fəqərədən başlayaraq büzdümə qədər kifotik vəziyyətdə olur, yaş artdıqca əvvəlcə bel nahiyyəsində önə doğru əyilmə (lordoz), daha sonra isə döş nahiyəsində arxaya doğru əyilmə (kifoz) əmələ gəlir. Beləliklə, onurğa sütunu yandan baxıldığı zaman “S” şəklini alır. Onurğada təbii olaraq yaranmış bu əyriliklər bədənin və başın ağırlığını daşımağa və bədən tarazlığını saxlamağa kömək edir. Döş nahiyyəsində olan əyrilik normaldan daha çox olarsa, bu zaman kifoz xəstəliyi yaranır.

Aztibb.az-ın xəbərinə görə, tanınmış reabilitoloq, fizioterapevt, idman zədələri üzrə mütəxəssis, osteopat Pərvin Əkbərov bu barədə məlumat verərək bildirib ki, normal kifoz 20-40 dərəcə arasındadır. Əgər əyrilik 40 dərəcədən başlayarsa, bu, hiperkifoz adlanır.

Kifozun simptomları hansılardır?

Kifoz xəstələrdə əsasən ağrı əlaməti və onurğa sütununun döş hissəsində əmələ gələn qabarıqlıqla özünü göstərir. Digər ümumi simptomlara aşağıdakılar daxildir:

-Çiyinlərin hündürlüyündə nəzərəçarpan fərq

-Bədənin qalan hissəsinə nisbətən başın önə doğru əyilməsi

-Xəstə irəli əyilərkən yan tərəfdən baxıldıqda döş fəqərələrində olan qabarıqlıq (yuvarlaq görüntü)

-Onurğa sütunu ətrafı əzələ ağrısı

-Ayaqlarda sinir sıxılması səbəbilə yaranan uyuşmalar

-Bədən tarazlığını saxlamaqda yaranan problemlər

-Yorğunluq (xüsusilə aşağı ətraf əzələlərində anormal duruşu təmin etmək üçün lazım olan artmış əzələ funksiyası)

-Dik durmaqda çətinlik

-Zəif duruş

"Daha ciddi kifoz əyrilikləri dərman müalicəsinin kifayət etmədiyi davamlı ağrılara, ağciyərlərə təzyiq nəticəsində tənəffüs problemlərinə səbəb ola bilər", - deyə həkim əlavə edib.