Azərbaycan Tibb Universitetinin (ATU) rektoru, professor Gəray Gəraybəyli Mərakeş krallığının ölkəmizdəki səfiri Mohamed Adil Embarch ilə görüşüb.

 

Aztibb.az xəbər verir ki, görüşdə Azərbaycan Tibb Universitetində Mərakeş vətəndaşlarının təhsili ilə bağlı məsələlər müzakirə olunub.

 

ATU-nun rektoru, professor Gəray Gəraybəyli qonağa universitetin yaranma tarixi, fəaliyyət istiqamətləri, müasir klinik bazaları və tələbə yataqxanaları barədə ətraflı məlumat verib. O, həmçinin son illər ərzində universitetdə aparılan islahatlar, yeniliklər, tədris planlarındakı dəyişikliklərdən danışıb. Rektor ATU-nun 5 ixtisasının beynəlxalq akkreditasiyadan keçdiyini də diqqətə çatdırıb.

 

Səfir Mohamed Adil Embarch isə çıxışında ölkəsindəki tibb universitetləri ilə ATU arasında əlaqələrin yaradılması, bu məqsədlə iki ölkənin ali təhsil müəssisələri arasında əlaqələrin genişlənməsinin zəruri olduğunu bildirib. 

 

Daha sonra ATU-nun Xarici tələblərlə iş üzrə dekan, dosent Qorxmaz Əhmədov əcnəbi tələbələrin qəbul prosesi haqqında qonağa məlumat verib. O, artıq 3 ildir əcnəbi tələbələrin ATU-ya onlayn qaydada qəbul olunduğunu bildirib. Q.Əhmədov bu məqsədlə “admission.amu.edu.az” saytının yaradıldığını qeyd edərək bu addımın qəbul prosesinin funksionallığına ciddi təsir göstərdiyini vurğulayıb.

 

Görüşdə ATU-nun işlər üzrə prorektoru Nizami Adilov, Beynəlxalq əlaqələr şöbəsinin müdiri dosent Müşfiq Orucov, Xarici tələbələrlə iş üzrə dekan dosent Qorxmaz Əhmədov, Mətbuat xidmətini rəhbəri Günel Aslanova, səfirin müşaviri Mohammed Faouzi Touger də iştirak edib.