Xəstəxanaya gətirilərkən körpənin bədəninin təxminən yarıya qədərinin şişdiyini bildirən nənə Gülər Niftəliyevanın sözlərinə görə, hadisə aprelin 28-də Ağdaş rayonunda taxıl sahələrinin birində baş verib və sahədə oynayan körpəni ilan sancıb:

 

“Emin ferma ərazisində taxıl əkilmiş ərazidə bacısı ilə oynayarkən onun ayağını ilan sancdı. Atası ilan sancan nahiyənin yuxarı hissəsindən körpənin ayağını bərk bağladı. Sonra uşağı Ağdaş Rayon Mərkəzi Xəstəxanasına çatdırdıq. Nəvəm orada ilkin tibbi müayinə edildikdən sonra təcili tibbi yardım maşını vasitəsilə Kliniki Tibbi Mərkəzə gətirildi. Açığı desəm artıq uşaqdan əlimizi üzmüşdük. Bura çatanda onun bədəni yarıya qədər şişmişdi. Kliniki Tibbi Mərkəzin peşəkar həkimləri sayəsində bu gün nəvəm sağdır. Onlar çox ağır vəziyyətdə olan Emini həyata qaytardılar. Həkimlərin hər birinə öz təşəkkürümüzü bildiririk”.

 

Kliniki Tibbi Mərkəzin Toksikologiya şöbəsinin həkim-terapevti Tünzalə Daşdəmirovanın sözlərinə görə, körpə vaxtında çatdırılmasaydı və buradakı tibbi müdaxilələr olmasaydı nəticə tam fərqli olardı:

 

“Xəstə 29 apreldə şöbəyə daxil olub. Xəstəxanaya daxil olarkən çox ağır vəziyyətdə idi. Xəstəyə aparılan zərdab və simptomatik müalicədən 3 gün sonra müəyyən dinamika hiss edildi. Hazırda xəstənin ümumi vəziyyətini kafi qiymətləndirmək olar. Toksikoloji baxımdan hər şey normadadır”.

 

Məlumat üçün qeyd edək ki, 3 yaşlı Emin Niftəliyevin bütün tibbi müayinə və müalicə xərcləri icbari tibbi sığorta ilə qarşılanıb. 19 günlük ciddi həkim nəzarəti və müalicədən sonra körpə artıq evə buraxılıb.