Aztibb.az xəbər verir ki, Mərkəzi Klinikada uşaq cərrahı Fuad Hüseynovun rəhbərliyi ilə icra olunmuş uğurla əməliyyatdan sonra körpə sağlamlığına qovuşub.

 

Həkimin sözlərinə görə, körpə hələ anasının bətnində olandan sidiyə çətinliklə çıxırdı, sidik kisəsinin ölçüləri olduqca böyük idi, dölyanı maye get-gedə azalırdı, hər iki böyrəyində və sidik axarlarında ciddi genişlənmə mövcud idi:

 

"Dünyaya gəldiyi gündən də sidiyə çıxa bilmədiyindən, məcburi kateter taxıldı və sonra doğulduğu klinikadan bizim klinikaya gətirildi. Bəs körpəni bu vəziyyətə salan səbəb nə idi?".

O, bildirib ki, sidiyə çətin çıxmasının səbəbi sidik kisəsinin çıxışında olan pərdə posterior uretral valve idi. Üstəlik də sidik hər iki sidik axarından böyrəklərə geri qayıdırdı (bilateral grade 5 vezikoüreteral reflüks). Belə vəziyyətdə gözləmək hər iki böyrəyin itirilməsi demək idi. Ona görə də məcburi cərrahi əməliyyat qərarı verildi. Kamera ilə sidik kanalından girilərək sidiyin axmasına mane olan pərdə kəsildi (PUV ablasiyası). Sidik rahat boşalsın deyə sidik kisəsi müvəqqəti qarnın ön divarına kiçik dəlik şəklində birləşdirildi (vezikostomiya+sünnət).

"Əməliyyatdan 1 gün sonra evlərinə yola saldıq. Davamlı bizim və nefroloqun nəzarətində olacaq. Balacanı 1 yaşında yenə bir cərrahi əməliyyat gözləyir, onun da öhdəsindən gələcəyinə inanırıq", - deyə uzman həkim əlavə edib.