Səhiyyə Nazirliyi İctimai Səhiyyə və İslahatlar Mərkəzinin (İSİM) nümayəndələri – Səhiyyə siyasəti və planlaşdırma şöbəsinin müdiri Nabil Seyidov, İlkin səhiyyə və ailə təbabəti şöbəsinin müdiri Lütfi Qafarov və İctimai sağlamlıq şöbəsinin müdiri Tofiq Musayev 9-11 may 2022-ci il tarixlərində CATINCA layihəsi çərçivəsində Tbilisidə keçirilən “Xəstəliklərin yükü – ümumi anlayışlar” mövzusunda seminarda iştirak ediblər.

 

Seminarın təşkilində məqsəd metodoloji bacarıqların formalaşdırılması, əhalinin sağlamlığının ümumi göstəricilərinin qiymətləndirilməsi üçün məlumat infrastrukturunun təkmilləşdirilməsi və səhiyyə siyasətinə uyğun səhiyyə informasiya sistemlərinin inkişafına töhfə verməkdir.

 

Qeyd edək ki, “CATINCA – Səhiyyə siyasətinin inkişafı üçün imkanlar və infrastrukturlar” təşəbbüsü Robert Kox İnstitutunun (Almaniya) Xəstəliklərin yükü üzrə işçi qrupu tərəfindən irəli sürülüb. Almaniya Federal Təhsil və Tədqiqat Nazirliyi tərəfindən təsdiq edilmiş CATINCA layihəsinin Cənubi Qafqaz və Mərkəzi Asiya ölkələrinin iştirakı ilə üç il ərzində həyata keçirilməsi nəzərdə tutulub. Layihənin əsas məqsədi səhiyyə məlumatlarının rəqəmsallaşdırılması və sübuta əsaslanan səhiyyə siyasətinin formalaşdırılmasında mövcud bərabərsizlikləri aradan qaldırmaq üçün Mərkəzi Asiya və Cənubi Qafqazı “Avropada Xəstəliklərin Yükü Şəbəkəsinə” (Burden-EU COST) daha da yaxınlaşdırmaqdır.