İsrailin Şeba xəstəxanasının Osbtetriklər və Ginekoloji departamentinin sədr müavini, professor Yaron Rabinoviç mayın 8-də Bakıda keçiriləcək "Ginekoloji və reproduktiv təbabətin problemləri" mövzusunda elmi-praktik konfransda iştirak etmək üçün Azərbaycana səfər edib.

Professor Y.Rabinoviç bununla bağlı təəssüratlarını Aztibb.az-a bölüşüb.

O, bildirib ki, akademik fikir və son tədqiqat işlərinin mübadiləsi üçün tibbin müxtəlif sahələrində tədqiqat aparan elm adamlarını bir araya gətirəcək konfrans həm də beynəlxalq əlaqələrin genişlənməsi baxımından əhəmiyyətlidir. Tədbirdə elmi və tibbi sahədəki biliklərimizi paylaşacaq, nəzəri və praktiki məsələləri müzakirə edəcəyik. 

Y.Rabinoviç konfransda dünyada 100 milyonlarla qadını əhatə edən və Azərbaycan üçün də vacib xəstəlik olan polistik yumurtalıq sindromu mövzusunda çıxış edəcəyini deyib: "Ümid edirik ki, bu, Şeba Tibb Mərkəzi və azərbaycanlı həkimlər arasında birgə elmi və tibbi əməkdaşlığın başlanğıcı olacaq".