Böyrəklərin funksiyası tamamiilə dayandığı zaman böyrək çatışmazlığından əziyyət çəkən xəstələrə həyatlarını davam etdirmək üçün "dializ " və " böyrək nəqli" ( transplantasiyası) seçimləri verilir. Dializ metodları çətin və sosial həyatda bir sıra problemlər yaratmasına baxmayaraq böyrək çatışmazlığından əziyyət çəkənlərin uzun müddət sağ qalmasına səbəb olur.

Aztibb.az xəbər verir ki, bu barədə nefroloq Barat Yusubov bildirib.

Həkim bildirib ki, orqan transplantasiyası daha üstün müalicə metodu sayılsa da,  bir çox hallarda pasientlər dializ metoduna üz tutmalı olurlar. B.Yusubov qandan zərərli maddələri təmizləyən və maye normasını tənzimləyən dializin 2 növü olduğunu bildirib.

"Periton dializ üsulunda bir torba içərisində yerləşən məhlul, xəstənin qarnına yerləşdirilən kateter vasitəsilə gündə 4 dəfə 40 dəqiqə olmaq şərtilə qarın boşluğuna verilir. Xəstənin evdə özünün edə biləcəyi bu yöntəmlə qandakı zəhərli maddələr və artıq maye qarın pərdəsi vasitəsi ilə uzaqlaşdırılır", - deyə həkim bildirib.

Əlavə edib ki, hemodializ üsulu isə böyrək funksiyalarının bir aparat tərəfindən yerinə yetirildiyi bir metod olub, həftədə 4 dəfə 4 saat həkim nəzarəti altında aparılmalıdır.