Bu gün Vətən müharibəsinin yeganə xanım şəhidi, Azərbaycan Ordusunun hərbi tibb qulluqçusu olan Arəstə Baxışovanın doğum günüdür.

Aztibb.az xəbər verir ki, Arəstə Baxışova mayın 4-də Xaçmazda anadan olmuşdu. O, 1995-2004-cü illərdə Biləcəri qəsəbəsində yerləşən Şuşa şəhər 3 nömrəli tam orta məktəbdə təhsil almış, 2008-ci ildə Azərbaycan Dövlət Pedaqoji Kollecini "ingilis dili" ixtisası üzrə bitirmişdi.

Pedaqoji kolleci bitirməsinə baxmayaraq, hərbiyə olan marağı və həvəsi onu Azərbaycan Silahlı Qüvvələrinin Baş Hərbi Hospitalında tibbi statist işləməyə sövq etmişdi. Arəstə Baxışova tibbi kurs keçərək Beyləqandakı hərbi hissədə tibb bacısı kimi fəaliyyətə başlamışdı.

İki uşaq anası olan Arəstə Baxışova Vətən müharibəsinin başlandığı ilk günlərdən könüllü olaraq cəbhəyə yola düşmüşdür. O, ailəsinə döyüşlərin ən qızğın yerlərində olduğunu bildirməmişdir. 

“Dedi ki, Vətən uğrunda şəhid olacağamsa, bu mənim alın yazım, mənim qürurumdur, mənim başımın ucalığıdır. Ana, əgər mənə bir şey olsa, uşaqlarım sənə əmanətdir”.

Azərbaycan Ordusunun çavuşu olan hərbi feldşer Arəstə Baxışova Vətən müharibəsi zamanı Füzuli, Zəngilan və Qubadlının azadlığı uğrunda gedən döyüşlərdə neçə-neçə yaralı əsgərimizə döyüş meydanındaca tibbi yardım göstərmiş, onların həyatını xilas etmişdi.

O, 12 iyul 2019-cu ildən Azərbaycan Silahlı Qüvvələrinin Beyləqan rayonunda yerləşən “N” saylı hərbi hissəsində operator vəzifəsində xidmət etmişdi. Ölümündən 1 ay əvvəl mətbuatdakı çıxışında demişdi: “Oğlum Mərdanın 11 yaşı var. O da ordumuzla qürur duyur və hərbçi olmaq niyyətindədir. Varlığımla inanıram ki, nəinki mənim oğlum, hətta çağırış yaşlılarımız da işğaldan azad edəcəyimiz torpaqlarda xidmət edəcəklər”.

Arəstə Baxışova oktyabrın 23-də Qubadlıda gedən döyüşlər zamanı növbəti dəfə yaralı əsgərlərimizi atışma bölgəsindən çıxaranda aldığı güllə yarasından qəhrəmancasına şəhid olmuşdur. Neçə-neçə yaralımıza məlhəm olan, onların həyata qayıtmasına yardım edən Arəstəyə tale məlhəm olmadı, Vətən, torpaq yolunda canını fəda edib ölümsüzlüyə qovuşdu!

Ölkə Prezidenti İlham Əliyevin 15 dekabr 2020-ci il tarixli sərəncamı ilə Arəstə Baxışova ölümündən sonra “Vətən uğrunda” medalı, 2021-ci il mayın 12-də isə Beynəlxalq Qırmızı Xaç Komitəsi tərəfindən ingilis tibb bacısı Florens Naytingelin şərəfinə təsis olunmuş “Florence Nightingale” medalı ilə təltif edilmişdir.

Əsl hərbçi, əsl şəfqət bacısı, tibb qulluqçusu, qəhrəman şəhidimizin büstü isə gənc heykəltəraş Müstəqil Babayev tərəfindən hazırlanıb.

Vətən, xalq yolunda canını fəda edən, həyatını qurban verən igid oğullarımız və qızlarımızla fəxr edir, qürur duyuruq! Onlar öz vətənpərvərlik borclarını qətiyyətlə, böyük əzmlə yerinə yetirdilər. Şəhidlərimizin qanı ilə alınan torpaqlarda bu gün üçrəngli bayrağımız qürurla dalğalanır. Vətən uğrunda şəhidlik məqamına yüksələn şəhidlərimizin qəhrəmanlıqları, fədakarlıqları heç zaman unudulmayacaq. Onlar Azərbaycan xalqının əbədiyaşar ölməz qəhrəmanlarıdır...

Allah şəhidlərimizə rəhmət eləsin!