Sumqayıt şəhər Cümə Məscidinin təşəbbüsü, Sumqayıt Tibb Mərkəzinin (STM) təşkilatçılığı ilə Ramazan bayramı münasibəti ilə şəhərin aztəminatlı ailələrinin uşaqları üçün sünnət xeyriyyə aksiyası keçirilib.

Sumqayıt Tibb Mərkəzinin tabeliyində olan Uşaq xəstəxanasında cərrahlar tərəfindən uşaqlara ambulator baxış keçirildikdən sonra onlara göstəriş üzrə “Circumcizio” (sünnət) əməliyyatı həyata keçirilib.

Üç gün davam edən aksiyada ümumilikdə 60 uşaq sünnət edilib. Uşaqlar aztəminatlı ailələr arasından seçilib. Əməliyyatlar uğurla başa çatıb, uşaqların ailələri bu aksiyaya görə təşkilatçılara, bu işdə əməyi keçən kollektivə təşəkkür ediblər.

Aksiyanın sonuncu günü STM-in direktoru Səkinə Sadıxova Uşaq xəstəxanasında olub, valideynləri təbrik edib.