Son günlər mövsümə uyğun olaraq allergik xəstəliklər aktiv olduğu üçün allergik konyunktivitdən əziyyət çəkənlər daha çox müraciət edirlər. Statistikaya görə allergik konyunktivit daha çox oğlanlarda rast gəlinir və onlar həmin patologiyanı daha ağır keçirirlər.
Bunu Səhiyyə Nazirliyinin mütəxəssis-eksperti, oftalmoloq Nigar Həsənova deyib.
O, həmçinin bildirib: “Həmin anda olan vəziyyət aradan qaldırıla bilinsə də xəstəlik 18 yaşadək hər il yaz mövsümündə müşahidə edilir. Elə bir il ola bilər ki, nisbətən yüngül, növbəti il daha ağır keçirə bilərlər. Odur ki, daha diqqətli olmaları tövsiyə olunur. Allergik konyunktivit özlüyündə qorxulu xəstəlik olmasa da uşaqlar gözlərini mexaniki olar ovurlar, nəticədə buynuz qişa patologiyalarının yaranma tezliyi çoxalır. Anamnezində allergiyası olan uşaqlarda həmin xəstəliklərə daha tez-tez rast gəlinir. İstəyirik ki, uşaqlar mexaniki olaraq gözlərini qaşımasın və zədələməsinlər. Ona görə də maksimal dərəcədə vəziyyəti dərmanlarla sakitləşdirməyə çalışırıq”.
