Aprelin 28-də Azərbaycan Memarlıq və İnşaat Universitetində  “Vərdiş” Narkotikə YOX de!" adlı qısametrajlı filmin təqdimatı keçirilib.

Aztibb.az xəbər verir ki, film Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Narkotizmlə Mübarizə” İctimai Birliyinin həyata keçirdiyi layihə çərçivəsində ərsəyə gəlib.

Təqdimaq mərasimində layihənin koordinatoru Kənan Qubadzadə bildirib ki, layihənin əsas məqsədi qısametrajlı film vasitəsilə cəmiyyəti narkomaniya bəlasından qorunmaq yönündə maarifləndirməkdir. Ekran əsəri gəncləri narkotikdən və digər pis vərdişlərdən uzaq olmağa çağırır.

O, filmin mətbuatda və televiziyalarda yayımlanacağını, youtube və digər sosial şəbəkələrdə təbliğ olunacağını bildirib.

Daha sonra Milli Məclisin deputatları Vüqar İskəndərov, Jalə Əhmədova, Müşfiq Cəfərov, ekspertlər Bayram Aslanov, Ruhi Əliyeva, Anar Sarıyev çıxış edərək Azərbaycanda narkotiklə mübarizə istiqamətində görülən işlərdən, maarifləndirmə xarakterli olan filmlərin əhəmiyyətindən danışıblar.

Qeyd olunub ki, narkomaniya ümumbəşəri bir problemdir və ölkəmizdə müvafiq dövlət qurumları, hüquq mühafizə orqanları, o cümlədən vətəndaş cəmiyyəti institutları tərəfindən narkomaniyaya qarşı mübarizə həyata keçirilir. Narkomaniya ilə bağlı maarifləndirmə tədbirlərini daha səmərəli qurmaq üçün Qeyri-Hökumət Təşkilatlarına Dövlət Dəstəyi Agentliyi tərəfindən qrant layihələri təqdim olunur.

Çıxışlardan sonra əsasən maarifləndirmə funksiyasını yerinə yetirən, narkomaniyanın doğurduğu faciələr barədə aydın təsəvvür yaradan “Vərdiş” Narkotikə YOX de!" filmi nümayiş olunub.