Astara Rayon Polis Şöbəsinin təşkilatçılığı ilə Astara Pedaqoji Kollecinin tələbələri ilə “Gəncliyimizi narkomaniyadan qoruyaq!” mövzusunda maarifləndirici görüş təşkil edilib.

Daxili İşlər Nazirliyinin mətbuat xidmətinin Lənkəran regional qrupundan bildirilib ki, Astara rayon Mərkəzi kitabxanasında keçirilən görüşdə çıxış edən Rayon Polis Şöbəsinin rəisi, polis polkovniki Azər Cəfərov narkomaniyanın səbəb olduğu ağır nəticələr barədə iştirakçılara ətraflı məlumat verib. Diqqətə çatdırıb ki, narkotik vasitələrin qanunsuz dövriyyəsinə qarşı hüquq-mühafizə orqanlarının keçirdikləri əməliyyat-axtarış, əməliyyat-istintaq tədbirləri ilə yanaşı, gələcəyimiz olan yeniyetmə və gənclərlə maarifləndirici görüşlərin keçirilməsi, onlara narkomaniya bəlası haqqında dolğun məlumatların verilməsi işi də mühüm əhəmiyyət kəsb edir.

Sonra çıxış edənlər ölkəmizin işıqlı sabahının məhz sağlam, savadlı gənclərlə mümkün olduğunu bildiriblər. Qeyd olunub ki, hər bir gənc zamanını təhsilə, idmana və cəmiyyət üçün faydalı ola biləcək işlərə ayırmalı, zərərli vərdişlərdən uzaq durmalıdır.

Sonda mövzularla bağlı videoçarxlar izlənilib və tədbir iştirakçılarının sualları cavablandırılıb.