ÜST-nin Avropa üzrə regional direktoru Hans Henri P. Kluge Həbsxanalarda Vərəmin Profilaktikası və Nəzarəti üzrə ÜST ilə Əməkdaşlıq Mərkəzində olub.
O, həmçinin Ədliyyə Nazirliyinin Tibb Baş İdarəsinin rəisi, general Rəfail Mehdiyev, təlim mərkəzinin direktoru İradə Məmmədova, Ədliyyə Nazirliyi Penitensiar Xidmətinin Xüsusi Müalicə Müəssisəsi və Baş Tibb İdarəsinin işçiləri və baş həkimləri ilə görüşüb.
Ədliyyə sistemində çalışan həkimlər üçün keçirilən təlimdə iştirak edən H.Kluge onlara fəaliyyətlərində uğurlar arzulayıb.
Qonaq Əməkdaşlıq Mərkəzi ilə tanışlıqdan sonra Xüsusi Müalicə Müəssisəsinə, orada yerləşən vərəm və COVID-19 müayinəsinin aparıldığı referens laboratoriyaya baxış keçirib, müalicə aparılan müəssisələrdə vərəmli məhbuslarla söhbət edib.
Daha sonra general R.Mehdiyevlə birgə iş planı, əməkdaşlığın genişləndirilməsi və yol xəritəsinin hazırlanması ilə bağlı müzakirələr aparıb.
