28 aprel 2022-ci il tarixində “Qan Donorları Assosiasiyası” İctimai Birliyi və Niderlandda gənclər, səhiyyə, eyni zamanda humanitar sahədə aparıcı təşkilat olan “Birlikdə Güclüyük" Fondu arasında əməkdaşlıq memorandumu imzalanıb.

Qan Donorları Assosiasiyasının mətbuat xidmətindən Aztibb.az-a verilən məlumata görə, Niderland və Azərbaycanda fəaliyyət göstərən hər iki Qeyri Hökumət Təşkilatı (QHT) qan donorluğunun inkişafı istiqamətində birgə əməkdaşlıq edəcəklər.

Memoranduma əsasən yaxın gələcəkdə ölkə xaricində gənclərin sağlam həyat tərzinin formalaşması, qan donorluğunun inkişaf etdirilməsi, qan xəstəliklərindən əziyyət çəkən insanlara təmənnasız, könüllü dəstəyin göstərilməsi, eləcə də yerli və beynəlxalq düşərgələrin, əyləncə proqramları və elmi konfransların təşkili, o cümlədən bu sahədə effektiv nəticələrin əldə olunması üçün fəaliyyət planının hazırlanması nəzərdə tutulur.

Sənədi "Qan Donorları Assosiasiyası" İctimai Birliyinin sədri Fuad Əsgərov və “Birgə Yardım" Fondunun direktoru İlkanə Qoca imzalayıblar.

İmzalanma mərasimində iştirak edən qan xeyriyyəçisi, beynəlxalq təhsil üzrə ekspert Sərdar Yusif oğlu birgə əməkdaşlığın hər iki ölkənin gəncləri üçün böyük əhəmiyyət kəsb etdiyini vurğulayıb.

Qeyd edək ki, Qan Donorları Assosiasiyası 15 ilə yaxındır respublikada qan donorluğunun inkişafı sahəsində fəaliyyət göstərir və gənclərin könüllü qanvermələrə cəlb olunması üçün məqsədyönlü layihələr həyata keçirir. Birliyin hədəfi gənclərin bu layihələrdə fəal sürətdə iştirakını təmin etməkdir.