Bu gün Elmi-Tədqiqat Mamalıq və Ginekologiya İnstitutunda Ümumdünya DNT Günü ilə bağlı tədbir keçirilib.
Əvvəlcə müəssisənin direktoru, t.e.d., professor Cəmilə Qurbanova çıxış edərək Ümumdünya DNT Gününün əhəmiyyətindən danışıb.
Sonra Tibbi genetik laboratoriya şöbəsinin müdiri Kamilə Dadaşovanın “DNT haqqında məlumat” adlı təqdimatla çıxış edərək Dezoksiribonuklein turşusu (DNT), onun tədqiqat sahəsində ən son nailiyyətlər və əldə olunan nəticələr barəsində tədbir iştirakçılarına ətraflı məlumat verib.
Məruzəçi ETMGİ-də yenidoğulmuşların maddələr mübadiləsi xəstəliklərinə dair skrininq üzrə dövlət proqramının icrası çərçivəsində DNT diaqnostikanın aparılmasının planlaşdırılmasından, bunun isə gələcəkdə irsi xəstəliklərin yayılmasının azalması və sağlam nəsilin doğulması üçün önəmindən danışıb.
Təqdimatdan sonra şöbənin genetikləri tərəfindən laboratoriyada aparılan elmi-tədqiqat işləri nümayiş olunub.
Yenidoğulmuşlar arasında əsas beş genetik xəstəliyə görə (fenilketonuriya, galaktozemiya, adrenogenital sindrom, mukovissedoz, anadangəlmə hipoterioz) aparılan skrininq müayinələri barəsində ətraflı məlumat verən genetiklər hamilə qadınların skrininqi nəticəsində aşkara çıxarılması mümkün xəstəliklər olan Daun, Edvard spotal sindromları, Terner sindromu, spinabefida, anensefaliya barəsində də geniş izahat veriblər.
