“YAŞAT” Fondu tərəfindən Türkiyə Respublikasında ikinci müalicəsini bitirərək yenidən Vətənə dönən qazi Rüstəmli İlkin Elçin oğlu Füzulidə təmtəraqla qarşılanıb. Füzuli rayon Aşağı Yağlıvənd kənd sakini olan qazi İlkinin qarşılanma mərasimində şəhid ailələri, qazilər, Füzuli Rayon İcra Hakimiyyətinin məsul əməkdaşları, rayon ictimaiyyəti, kənd orta məktəbin kollektivi, kənd sakinləri iştirak ediblər.

Kənd orta məktəbdə keçirilən tədbirdə çıxış edənlər Ali Baş Komandan İlham Əliyevin şəhid ailələrinə, qazilərə göstərdiyi diqqət və qayğıdan danışıblar. Qazi İlkin Rüstəmli də öz növbəsində ona göstərilən diqqət və qayğıya görə Ali Baş Komandan İlham Əliyevə xüsusi minnətdarlığını bildirərək, şəhidlərimizə rəhmət, qazilərimizə şəfa, əsgər və zabitlərimizə isə cansağlığı arzulayıb.

Qeyd edək ki, Vətən müharibəsi qazisi olan Rüstəmli İlkin Elçin oğlu 1999-cu il iyulun 22-də Füzuli rayonu Aşağı Yaglıvənd kəndində anadan olub. Hərbi xidmətini Xüsusi Təyinatlı Qüvvələr sırasında keçib. Bir çox kursu yüksək nailiyyətlərlə başa vuran İlkin hərbi xidmətini kiçik çavuş kimi davam etdirib. 44 günlük Vətən müharibəsində Kəlbəcər, Cəbrayıl, Xocavənd, Şuşa istiqamətində gedən döyüşlər zamanı şücaəti ilə seçilib. Oktyabrın 22-də gərgin döyüşlər zamanı yaralanan İlkin hospitala yerləşdirilib, daha sonra müalicə üçün “YAŞAT” Fondunun dəstəyi ilə qardaş Türkiyəyə göndərilib. Müalicəsini bitirən İlkin ötən gün Vətənə dönüb.

Qazi İlkin Rüstəmli döyüşlərdə göstərdiyi şücaətə görə “Kəlbəcərin azad olunmasına görə”, “Cəbrayılın azad olunmasına görə”, “Xocavəndin azad olunmasına görə”, “Şuşanın azad olunmasına görə”, “Vətən müharibəsi iştirakçısı” medalları və “Rəşadət” ordeni ilə təltif olunub.