Sumqayıt Tibb Mərkəzinin tabeliyində olan 3 nömrəli Ailə Sağlamlıq Mərkəzində (ASM) “Pediatrik və terapevtik xəstələrdə sidik yolu infeksiyaları” mövzusunda maarifləndirici seminar keçirilib.

 

Aztibb.az-ın məlumatına görə, seminarda Sumqayıt Tibb Mərkəzinin tabeliyində olan ASM-lərin pediatr və terapevtləri iştirak ediblər.

 

Tədbirdə 3 nömrəli ASM-in pediatrı Günay İsmayılzadə və terapevt Nazilə Məmmədova müvafiq mövzuda təqdimatla çıxış ediblər.

 

Təqdimatda ailə həkiminin (sahə həkimi-terapevti, sahə həkimi-pediatrı) vəzifə və funksiyalarından danışılıb. Bildirilib ki, ailə həkimi sığortaolunanlara ilkin səhiyyə xidmətləri göstərən həkimdir.

 

Həmçinin sidik yollarının infeksiyasına səbəb olan amillərdən söz açılıb, problemlər və çıxış yollarından bəhs edilib.

 

Bu sahədə mövcud olan xəstəliklərin kliniki protokolları və yeni yanaşmaları seminar iştirakçılarının diqqətinə çatdırılıb.

 

Sonda iştirakçıları maraqlandıran suallar cavablandırılıb.