Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi QHT-ləri “2022-ci il kiçik qrant müsabiqəsi”ndə iştirak etməyə dəvət edir. Builki müsabiqəyə 7 istiqamət üzrə layihələr qəbul edilir.

Xəbərlə bağlı açıqlama verən İcbari Tibbi Sığorta üzrə Dövlət Agentliyinin (Agentlik) Marketinq və ictimaiyyətlə əlaqələr departamentinin rəhbəri Aynurə Əhmədova bildirib ki, Agentliyin təşəbbüsü ilə builki qrant müsabiqəsində əhalinin sağlamlığının qorunması ilə bağlı “İcbari tibbi sığorta haqqında əhalinin maarifləndirilməsi” mövzusu da yer alıb.

A.Əhmədovanın sözlərinə görə, QHT-lər tərəfindən əsasən ictimai yerlərdə əhalinin icbari tibbi sığorta haqqında maarifləndirilməsini təşkil etmək arzuolunandır: “Əhalinin bütün qruplarını əhatə edə bilmək üçün daha çox reklam monitorları olan iri ticarət mərkəzlərində, dəmiryolu vağzallarının kassa və gözləmə zallarında, poçt şöbələrində, avtobus, metro və dəmiryolu qatarları, kinoteatrlarda və s. məkanlarda maarifləndirici video/audioçarxların yayımını təşkil etmək, maarifləndirici materialların ünvanlı çatdırılmasını təmin etmək və digər bu kimi istiqamətlərdə tədbirlərin görülməsi tövsiyə olunur”.

Bir layihə üçün ayrılması nəzərdə tutulan maksimal məbləğ 10 000 manat təşkil edir. 2021-cı ilin 1 yanvar tarixindən sonra qeydiyyatdan keçmiş QHT-lər 5000 manatdan artıq olmayan məbləğdə layihə təklifləri verə bilər.

Layihələr 1 dekabr 2022-ci il tarixinə kimi yekunlaşmaqla 3 aya qədər olan müddəti əhatə edə bilər.

Müsabiqənin prosedur qaydaları:

Müsabiqə üzrə ərizələrin qəbulu 13 aprel 2022-ci il tarixindən 05 may 2022-ci il saat 18:00-a kimi elektron qaydada həyata keçirilir.

Müsabiqə ilə bağlı ətraflı məlumatı buradan əldə etmək olar.