Dövlət Gömrük Komitəsinin Tibbi Xidmət İdarəsinin rəis müavini, dosent İsmayıl Əfəndiyev Media Türk TV kanalına narkotiklərin yaratdığı xəstəliklər barədə danışıb. 

Sujetdə bildirilib ki, hazırda narkotik vasitələrdən istifadə Azərbaycan üçün çox aktualdır. Statistik rəqəmlərə nəzər salsaq görərik ki, ötən əsrin 90-cı illərinin əvvəllərindən indiyə qədər ölkəmizdə həm narkotik istifadəçilərinin sayı, həm də qeyri-leqal narkotik bazarında  satılan nakotik maddələrin növləri xeyli artıb.

İsmayıl Əfəndiyev qeyd edib ki, inyeksiya yolu ilə qəbul edilən narkotik vasitələr QİÇS, Hepatit C və digər təhlükəli yoluxucu xəstəliklərin yayılmasına səbəb olur. İnsanların psixiki durumunu pozan, sinir sistemini dağıdan, daxili orqanlara bilavasitə təsir edən narkotik vasitələr də sürətlə yayılmaqdadır:

"Narkotik maddələrdən istifadə çoxlu sayda təhlükəli xəstəliklərin yaranmasına səbəb olur. Çox təəssüf ki, hazırda narkotik istifadəçiləri arasında həm gənclər, həm zəif cinsin nümayəndələri, həm də uşaqlar var."