Azərbaycanın regionlarında hemofiliya və digər koaqulopatiyalı insanlar üçün çoxprofilli yardım qruplarının yaradılması layihəsi reallaşdırılır. Layihə Novo Nordisk Hemofiliya Fondunun dəstəyi ilə həyata keçir.

Aztibb.az-ın məlumatına görə, bugünlərdə Hemofiliyalı Xəstələrin Respublika Assosiasiyası tərəfindən Naxçıvan Mərkəzi Xəstəxanasının nəzdində stomatoloji kabinet yaradılıb. Burada qan xəstəliyindən əziyyət çəkənlərin müalicə və müayinəsi üçün müasir standartlara cavab verən bütün zəruri tibbi avadanlıqlar quraşdırılıb.

Stomoatoloji problemləri olan, hemofiliya və digər qanın laxtalanma pozğunluğu olan pasiyentlər stomatoloji kabinetdə müalicə imkanı əldə edəcəklər.

Kabinetin açılışında TƏBİB-in məsul baş mütəxəssisi, Hemofiliyalı Xəstələrin Respublika Assosiasiyasının nümayəndə heyəti, eləcə də Milli Hematologiya və Transfuziologiya Mərkəzinin və Naxçıvan Mərkəzi Xəstəxanasının tibb işçiləri iştirak ediblər.