Ən müasir və son model tibbi avadanlıqlarla təchiz edilmiş Azərbaycan Tibb Universitetinin Tədris Cərrahiyyə Klinikasında hər cür əməliyyatlar uğurla icra edilir. Artıq neçə illərdir ki,  klinikanın təcrübəli həkimləri tərəfindən böyrək daşlarının çıxarılmasında ən çox yayılmış və müasir əməliyyat üsullardan istifadə edilir.

Aztibb.az xəbər verir ki, Azərbaycan Tibb Universitetinin Tədris Cərrahiyyə Klinikasının Urologiya şöbəsinin həkimi Timurçin Məhərrəmbəyli bildirir ki, bu günlərdə klinikaya müraciət edən 31 yaşlı qadın pasiyentdə də belə əməliyyatın icrası vacib hesab edilib:

“Xəstə sol böyrək nahiyəsində olan ağrılar, tez-tez təkrarlanan sidik yolu infeksiyası, ürəkbulanma, ümumi zəiflik, halsızlıq şikayətləri ilə klinikaya müraciət etmişdi. Aparılan laborator və instrumental müayinələr nəticəsində xəstədə böyrək ləyənini və kasacıqları tamamilə dolduran 65mm*79mm ölçülərində mərcanvari və çoxsaylı daşlar aşkarlandı. Bu xəstənin böyrəyindəki daşın təmizlənməsi üçün ən uyğun və ən müasir metod sayılan perkutan nefrolitotomiya əməliyyatının həyata keçirilməsi qərara alındı. Əməliyyat nəticəsində daşlar tamamilə təmizləndi”.

T.Məhərrəmbəyli qeyd edir ki, bu, endoskopik perkutan nefrolitotomiya pnevmatik litotriptorun birbaşa təsiri ilə daşı xırda hissələrə parçalamağa və böyrəkdən təmizləməyə yönəlmiş az invaziv bir əməliyyat növüdür. Əməliyyat ümumi anesteziya altında həyata keçirilir. ATU-nun Tədris Cərrahiyyə Klinikasında icbari tibbi sığorta tətbiq olunduğundan, artıq bu tip əməliyyatları xəstəyə maddi problem yaratmadan icra etmək mümkün olur.

Böyük ölçülü və mərcanvari daşların böyrəkdən çıxarılmasında bu əməliyyatın effektivliyi sübut olunub. T.Məhərrəmbəyli böyrək ağrıları zamanı həkimə müraciət etməyi, vaxtında müayinə olunub müalicə almağı məsləhət görür.