Azərbaycan Tibb Universitetinin (ATU) rektoru, professor Gəray Gəraybəyli I Azərbaycan-İtaliya Beynəlxalq Rinoloji Konqresinin iştirakçıları ilə görüşüb. İtalyan nümayəndə heyəti ilə görüş zamanı konqresin yekunları ilə yanaşı, qarşılıqlı əməkdaşlıq perspektivləri barədə də müzakirələr aparılıb.

Bu barədə Aztibb.az-a universitetdən məlumat verilib.

Bildirilib ki, görüş zamanı professor Gəray Gəraybəyli Azərbaycanın ali tibb təhsili verən yeganə universiteti olan ATU-nun yaranma tarixindən, həmçinin ölkəmizdə səhiyyə sahəsində aparılan islahatlardan danışıb. Rektor  I Azərbaycan-İtaliya Beynəlxalq Rinoloji Konqresinin bu sahə ilə bağlı yeniliklərin və problemlərin müzakirəsindən başqa, iki ölkənin mütəxəssisləri arasında əlaqələrin qurulması baxımından da önəmli olduğunu vurğulayıb.

I Azərbaycan-İtaliya Rinoloji Konqresinin vitse-prezidenti, QBB kafedrasının professoru və müdiri, Beynəlxalq Otorinolarinqoloqlar Cəmiyyətləri Federasiyasının İdarə heyətinin üzvü Desiderio Passali rəhbərlik etdiyi nümayəndə heyəti adından konqresin təşkili ilə bağlı Azərbaycan tərəfinə, ATU-ya təşəkkür edib. O, həmçinin 120 ölkənin təmsil olunduğu Beynəlxalq Otorinolarinqoloqlar Cəmiyyəti Federasiyasının əsas fəaliyyət istiqamətləri haqqında məlumat verib. Desiderio Passal mütəxəssislər arasında bu cür görüş və müzakirələrin hər iki tərəf üçün faydalı olacağından əminliyini bildirib.