8 aprel 2022-ci il tarixində Ankara Universitetinin Tibb fakültəsinin professoru Ömer Erdeve Mərkəzi Gömrük Hospitalında qonaq olub.
Ömer Erdeve ilkin olaraq Dövlət Gömrük Komitəsinin Tibbi Xidmət İdarəsinin nümayəndə heyəti ilə görüşüb.
Görüşdə Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Mərkəzi Gömrük Hospitalının rəisi Elman Məmmədov, Mərkəzi Gömrük Hospitalının Pediatriya və neonatologiya şöbəsinin rəisi Telman Aytayev, şöbənin pediatr-neonatoloqu Təranə Göyüşova və Elmi-Təcrübi Tədris Mərkəzinin mütəxəssisi Şəhla Mirzəzadə iştirak ediblər.
Əvvəlcə türkiyəli professora Tibbi Xidmət İdarəsinin və Mərkəzi Gömrük Hospitalının fəaliyyət istiqamətləri, o cümlədən elmi-təcrübi tədris işinin təşkili barədə geniş məlumat verilib. Qarşılıqlı əməkdaşlıq imkanları və gələcək fəaliyyətlər barədə müzakirələr aparılıb.
Daha sonra Ömer Erdeve Hospitalın iş şəraiti ilə yaxından tanış olub. O, Hospitalın fəaliyyətini yüksək qiymətləndirdiyini vurğulayıb.
