Bu gün Azərbaycan Tibb Universitetində (ATU) UNİCEF-in Azərbaycan nümayəndəliyinin rəhbərliyi ilə görüş keçirilib.

Görüşdə iki qurum arasında əməkdaşlığa dair memorandum imzalanıb.

ATU-nun rektoru, professor Gəray Gəraybəyli ölkənin tibb təhsili verən yeganə ali məktəbi barədə qonağı məlumatlandırıb, universitetin beynəlxalq əlaqələri, xarici ölkələrdəki universitetlərlə əməkdaşlığı haqqında danışıb.

Professor G.Gəraybəyli qeyd edib ki, ATU xarici tələbə sayına görə Azərbaycanda birinci yerdədir. Bir sıra ölkələrin universitetləri ilə tələbə, müəllim mübadiləsi həyata keçirir: "O cümlədən elmi-tədqiqat işlərini, birgə layihələri təmin edən ikitərəfli müqavilələr fəaliyyətdədir. Bu il universitetimizin 3 təhsil proqramının beynəlxalq akkreditasiyadan keçməsi müasir dünya ilə inteqrasiya kontekstində çox önəmlidir”.

UNİCEF-in Azərbaycan nümayəndəliyinin rəhbəri Aleks Haykens bu qurumun ölkəmizdəki fəaliyyəti, həyata keçirilən layihələr barədə məlumat verib. O, ATU-nu UNİCEF-lə ÜST-ün yeni birgə layihəsinə qoşulmağı təklif edib var. "Biz akademik araşdırmalar üzərində birgə işlər apara bilərik. Bu gün imzaladığımız memorandum bir deyil, artıq bir çox sahələr üzrə əməkdaşlıq əlaqələrimizi nəzərdə tutur. Tədris proqramlarının yenilənməsi, elmi işlər və s. bura daxildir”.

ATU-nun beynəlxalq əlaqələr üzrə prorektoru, dosent Orxan İsayev isə UNİCEF-lə universitet arasındakı əlaqələr, aparılan işlər haqqında məlumat verib.

Daha sonra tərəflər arasında qarşılıqlı əməkdaşlığın perspektivləri müzakirə olunub.

Görüşün sonunda ATU və UNİCEF-in Azərbaycan nümayəndəliyi arasında əməkdaşlığa dair memorandum imzalanıb.