Dövlət Gömrük Komitəsi Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə 4 aprel 2022-ci il tarixində Ümumdünya Vərəmlə Mübarizə Gününə həsr olunmuş beynəlxalq konfransda iştirak edib.

Aztibb.az xəbər verir ki, konfrans Azərbaycan Vərəm əleyhinə QHT Koalisiyasının aparıcı vətəndaş cəmiyyəti təşkilatı olan “Sağlamlığa Xidmət” İctimai Birliyi tərəfindən Yaponiyanın “Fujifilm” və “Araş” medikal şirkətlərinin baş sponsorluğu, eləcə də Yaponiyanın Azərbaycandakı səfirliyinin və “Stop vərəm” tərəfdaşlığının dəstəyi ilə təşkil edilib.

Konfransın açılış mərasimində Milli Məclisin Səhiyyə komitəsinin üzvləri Sədaqət Vəliyeva, Soltan Məmmədov, Məlahət İbrahimqızı, Kamilə Əliyeva, səhiyyə nazirinin müavini Nadir Zeynalov, ÜST-ün ölkəmizdəki nümayəndəsi Hande Harmancı, Tibbi Ərazi Bölmələrini İdarəetmə Birliyinin (TƏBİB) Xəstəliklərin profilaktikası və kontrolu departamentinin müdiri Yaqut Qarayeva, Ədliyyə Nazirliyi Tibbi Baş İdarəsinin rəisi Rəfail Mehdiyev, Yaponiyanın Azərbaycandakı səfiri Cuniçi Vada, “Stop vərəm” Partnyorluğunun icraçı direktoru Lucica Ditiu və digər qonaqlar salamlama nitqi ilə çıxış ediblər.

Rəsmi hissədən sonra Elmi-Tədqiqat Ağciyər Xəstəlikləri İnstitutunun direktoru, professor Həqiqət Qədirova, ÜST-ün İctimai səhiyyə üzrə mütəxəssisi Elturan İsmayılov, Ölkə Əlaqələndirmə Komissiyasının Maliyyə və Proqram üzrə meneceri Aytən Hüseynova, Azərbaycan Vərəm Əleyhinə QHT Koalisiyasının rəhbəri, “Sağlamlığa Xidmət” QHT-nin direktoru Elçin Muxtarlı təqdimatla çıxış ediblər.

Təqdimatlardan sonrakı müzakirə panelində Dövlət Gömrük Komitəsi Tibbi Xidmət İdarəsinin Elmi-Təcrübi Tədris Mərkəzinin mütəxəssisi Şəhla Mirzəzadə də çıxış edərək ictimai sağlamlıq problemi olan vərəmlə mübarizədə qurumlararası əməkdaşlığın, eləcə də dövlət və özəl sektorun qarşılıqlı fəaliyyətinin mühüm əhəmiyyət kəsb etdiyini vurğulayıb, konfransın təşkilatçılarına təşəkkürünü bildirib.